XIV. mende bukaeran Urola ibaia zeharkatzeko eraikia, Urolako errege-bidearen parte zen. Jatorrizko zubia egurrezkoa zen, baina orain ikus daitekeena XVIII. mendean harriz berreraiki zena da. Joan I.ak Zestoako hiribilduari emaniko hiri-gutunean ezartzen zen baldintzetako bat ibaiaren ibi natural batean zubi bat eraiki eta beraren mantenuaz arduratzea izan zen. Zubi hau eraiki aurretik, Urolako errege-bidean zehar gurdi asko ibiltzen ziren burdinez, egurrez, harriz edo beste hainbat produktuz kargatuta, Urola ibaiaren parera iristean ibi naturalak aurkitu behar izaten zituzten igaro ahal izateko, ibaiak ur emari handia zuen garaietan oso gauza zaila eta arriskutsua bihurtzen zen. Beste herri askotan bezala, Zestoan ere Erdi Aroan arazo hori egurrezko zubi bat eraikiz konpondu zen, denborarekin ordea egurrezko zubia ez zen nahikoa, batetik ibaiaren hazkundeek zubia larriki kaltetzen zutelako, bestetik berriz, gurdien ibiliak zubia sarri konpondu beharra zekarrelako. XVIII. mendean eraiki zen gaur egun ikusi daitekeen harrizko zubia, merkantzien pasaera nabarmen erosotuz.

---